இந்தியப் பொருளாதாரத்தின் முதுகெலும்பாக உள்ள சிறு, குறு, நடுத்தர தொழில்களை (MSME) வலுப்படுத்துவதில் பட்டயக் கணக்காளர்கள் ஆற்றிய பங்கை அங்கீகரிப்பதற்காக 75 நகரங்களில் 75 நிகழ்ச்சிகளுடன் இந்திய பட்டய கணக்காளர்கள் நிறுவனம் ஐ.சி.ஏ.ஐ எம்.எஸ்.எம்.இ யாத்ராவை 75 நாட்களுக்கு ஏற்பாடு செய்துள்ளது.
கோவையில் எம்.எஸ்.எம்.இ யாத்திரையை மாவட்ட ஆட்சியர் சமீரன் வெள்ளிக்கிழமை கொடியசைத்து துவக்கி வைத்தார். தென்னிந்திய ஆடிட்டர் அசோசியேஷன் தலைவர் ஈஸ்வர், சி.ஏ இன்ஸ்டிடியூட் கிளைத் தலைவர் பழனிசாமி, துணைத் தலைவர் நாககுமார், பொருளாளர் ராகுல், சி.ஏ மாணவர் சங்கத் தலைவர் சர்வஜித், கமிட்டி உறுப்பினர்கள் தங்கவேல், சதீஷ் ஆகியோர் இதில் கலந்துகொண்டனர். தென்னிந்திய முன்னாள் தலைவர் ஜலபதி மற்றும் கிளையின் முன்னாள் தலைவர்கள் கலந்து கொண்டனர்.
சிறு, குறு, நடுத்தர தொழில்களுக்காக ஐ.சி.ஏ.ஐ உடன் புரிந்துணர்வு ஒப்பந்தத்தில் கையெழுத்திட்ட நாட்டிலேயே தமிழ்நாடு அரசு முதன்மையானது.
இந்த வாகனம் நகரம் முழுவதும் பயணித்து முக்கிய இடங்களில் நிறுத்தப்பட்டு எம்.எஸ்.எம்.இ திட்டங்கள் பற்றிய தகவல்களை பொதுமக்களுடன் பகிர்ந்து கொள்ளும். இந்திய பட்டய கணக்காளர்கள் நிறுவனத்தின் உறுப்பினர்கள், எம்.எஸ்.எம்.இ – கள் மற்றும் திட்டங்கள் பற்றிய ஃபிளையர்கள் / பிரசுரங்களை பொதுமக்களுக்கு விநியோகிக்க பேருந்தில் பயணிப்பார்கள்.
இன்று மாலை 4.30 மணி முதல் இரவு 7.30 மணி வரை, ஐ.சி.ஏ.ஐ.,யின் துடியலூர் கிளை வளாகத்தில் எம்.எஸ்.எம்.இ திட்டங்கள் குறித்த கருத்தரங்கம் நடைபெற உள்ளது. மேயர் கல்பனா அனந்தகுமார் நிகழ்ச்சியை துவக்கி வைக்கிறார்.
பல்வேறு நிதி நிறுவனங்களின் புகழ்பெற்ற ஆசிரிய உறுப்பினர்கள் மற்றும் பிரதிநிதிகள் எம்.எஸ்.எம்.இ கொள்கை, திட்டங்கள் பற்றி உரையாற்றுகின்றனர். பட்டயக் கணக்காளர் சகோதரத்துவத்தைச் சேர்ந்த உறுப்பினர்கள், தொழில்முனைவோர், பல்வேறு தொழில்/தொழில்துறை அமைப்புகளைச் சேர்ந்த உறுப்பினர்கள் கலந்துகொள்கின்றனர்.