தூய்மைப் பணியாளர்களின் வேலை நேரத்தை மாற்றக் கோரியும், அவர்களுக்கு குறைந்தபட்ச கூலி வழங்கக் கோரியும் சமூகநீதி தூய்மைப் பணியாளர்கள் சங்கம் சார்பில் கோவை மாவட்ட ஆட்சியரிடம் மனு அளிக்கப்பட்டது.
இதுகுறித்து மனுவில் கூறியிருப்பதாவது:
கோவை மாநகராட்சியில் பணியாற்றும் தூய்மைப் பணியாளர்கள் வேலை தொடங்கும் நேரம் ஆங்கிலேயர் காலத்தில் அதிகாலை 5.45 மணிக்கு தொடங்கப்பட்டது.
இன்று வரையில் அதேநேரமே உள்ளது. இதனால் 3 மணி அளவிலேயே தூய்மைப் பணியாளர்கள் வீட்டைவிட்டு பணிக்குச் செல்ல வேண்டிய சூழ்நிலை உள்ளது. இதனால் தூய்மைப் பணியாளர்களின் குழந்தைகளை பராமரிக்க இயலாத சூழல் உள்ளது.
எனவே வேலை தொடங்கும் நேரத்தை காலை 7 மணிக்கு மாற்றம் செய்ய வேண்டும். மேலும் கோவையில் தூய்மைப் பணியாளருக்கு குறைந்தபட்ச தினசரி கூலி ரூ.333 ஆக உள்ளது. இதனை 605 ரூபாயாக உயர்த்தி வழங்க வேண்டும். என மனுவில் கூறப்பட்டுள்ளது.