பெட்ரோல்-டீசல் விலை அதிகரிப்பு பொதுமக்கள் பலரை இதய நோயாளியாக மாற்றிவிடும் அளவிற்கு பாடாய் படுத்தி வருகிறது. இந்த சூழ்நிலையில், மின்சார வாகனங்கள் மீதான ஈர்ப்பு அதிகரித்து வருகிறது. மின்சார பைக்குகள் மற்றும் மின்சார கார்களின் விற்பனையும் அதிகரித்து வருகிறது. இதனால் வாகன உற்பத்தி நிறுவனங்கள் இப்போது மின்சார வாகன உற்பத்தியில் அதிக கவனம் செலுத்தி வருகிறார்கள்.
இதற்கிடையில், மும்பையில் ஒரு ஸ்டார்ட் அப் நிறுவனம் ஒரு புதிய மின்சார காரை அறிமுகப்படுத்தியுள்ளது. இது உலகின் மிகவும் மலிவான மின்சார கார் (Electric Car) என்று வர்ணிக்கப்படுகிறது. இந்த காரின் முன்பதிவும் தொடங்கப்பட்டுள்ளது. மிக முக்கியமான விஷயம் என்னவென்றால், இந்த காரில் மூன்று சக்கரங்கள் மட்டுமே உள்ளன.
Strom Motors நிறுவனம் இந்த மின்சார காரை அறிமுகப்படுத்தியுள்ளது. அதற்கு Strom R3 என்று பெயரிடப்பட்டுள்ளது. இந்தியாவில் இந்த காருக்கான முன்பதிவையும் தொடங்கி விட்டது. மும்பை மற்றும் டெல்லி-என்.சி.ஆரில் ஸ்ட்ரோம் ஆர் 3 ஐ வெறும் ரூ .10,000 செலுத்தி முன்பதிவு செய்யலாம்.
இந்த மின்சார காரில் மூன்று சக்கரங்கள் உள்ளன. ஆனால் அதன் தோற்றம் ஒரு முச்சக்கர வண்டி போல் இல்லை. இதன் பின்புறத்தில் ஒரு சக்கரமும், முன்பக்கம் இரண்டு சக்கரங்களும் உள்ளன. இது ஒரு அற்புதமான தோற்றத்தைக் கொண்டுள்ளது. இந்த சிறிய மூன்று சக்கர கார் உலகின் மலிவான மின்சார கார் என்று கூறப்படுகிறது.