என்னடி முனியம்மா உன் கண்ணுல மைய்யி பாடல் மூலம் பிரபலமான பாடகரான டிகேஎஸ் நடராஜன் உடல்நல குறைவால் தனது 87 வது வயதில் காலமானார். அவர் பாடகராக மட்டுமல்லாது சில படங்களிலும் சிறு, சிறு கதாபாத்திரங்களிலும் நடித்துள்ளார்.
டிகேஎஸ் கலைக்குழுவில் சேர்ந்து நாடகங்களில் நடித்து வந்தார். அந்த குழுவில் இருந்ததால் தான் அவர் டிகேஎஸ் நடராஜன் என்று அழைக்கப்பட்டு வந்தார்.
1954ம் ஆண்டு வெளியான ரத்தபாசம் படம் மூலம் நடிகரான நடராஜன் 500க்கும் மேற்பட்ட படங்களில் நடித்துள்ளார். ரஜினிகாந்த், கமல் ஹாசன், கார்த்திக் என்று பல ஹீரோக்களுடன் சேர்ந்து நடித்தவர். சிறு கதாபாத்திரங்களில் நடித்திருந்தாலும் ரசிகர்களை தன்னை கவனிக்கச் செய்தவர்.
நடராஜனின் மறைவு குறித்து அறிந்த திரையுலகினரும், ரசிகர்களும் தங்களின் ஆழந்த இரங்கலை தெரிவித்துள்ளனர். மேலும் அவரின் ஆத்மா சாந்தியடைய பிரார்த்தனை செய்வதாக தெரிவித்துள்ளனர்.
கடந்த வாரம் தான் இயக்குநர்கள் தாமிரா, கே.வி. ஆனந்த், மூத்த நடிகர் செல்லத்துரை என்று மூன்று பேர் காலமானார்கள். இந்நிலையில் இன்று நடராஜன் இயற்கை எய்தினார்.