70 மற்றும் 80களில் டிவி உள்ள வீடு பெரிய பணக்காரர்கள் வீடாக கருதப்பட்டு வந்தது. அது அப்படியே காலப்போக்கில் கொஞ்சம் கொஞ்சமாக வளர்ந்து டிவி இல்லாத வீடே இல்லாத அளவிற்கு வளர்ந்து விட்டது. வசதிக்கு ஏற்றவாறு சாதாரண கருப்பு வெள்ளை டிவி முதல் விலையுயர்ந்த ஸ்மார்ட் டிவி வரை பல்வேறு விலையில் பல்வேறு அம்சங்களில் மக்களுக்கு ஏற்றவாறு சந்தையில் டிவிகள் விற்பனை செய்யப்படுகின்றன.
டிவிகள் இந்தியாவில் தயாரிக்கப்பட்டாலும் அவற்றுக்கான உதிரிப்பாகங்கள் வெளிநாட்டிருந்தும் இறக்குமதி செய்யப்படுகிறது. இறக்குமதி செய்யப்படும் உதிரிப்பாகங்களின் விலை மற்றும் இறக்குமதி வரியைப் பொறுத்தும் டிவிகளின் விலை நிர்ணயிக்கப்படுகிறது.
டிவி தயாரிப்பில் முக்கிய உதிரிப்பாகமாக உள்ள பேனல்கள் வெளிநாடுகளிலிருந்து இறக்குமதி செய்யப்படுகின்றன. இவற்றுக்கு சென்ற ஆண்டில் 5 சதவீத வரிச் சலுகை வழங்கப்பட்டிருந்தது. அச்சலுகை இந்த மாதத்துடன் முடிவடைகிறது. இதனால் அக்டோபர் மாதம் முதல் இறக்குமதிக்கு அதிகம் செலவாகும் எனவும், அதனால் டிவிகளின் விலையும் உயரும் என்று கூறப்பட்டுள்ளது. 32 இஞ்ச் டிவி பேனல் விலை இதற்கு முன்னர் 34 டாலராக மட்டுமே இருந்தது. தற்போது இறக்குமதிச் சலுகை முடியும் நிலையில் அதன் விலை 60 டாலராக உயர்ந்துவிடும்.
பேனல் உள்ளிட்ட உதிரிப்பாகங்களின் இறக்குமதி வரியைக் குறைக்க வேண்டும் என்று டிவி துறையினர் கோரிக்கை வைத்துள்ள நிலையில், மத்திய தகவல் தொழில்நுட்பத் துறை இதுகுறித்து ஆலோசித்து வருவதாகவும், வரிச் சலுகை வழங்க வாய்ப்பிருப்பதாகவும் கூறப்படுகிறது. ஏனெனில், சாம்சங் உள்ளிட்ட நிறுவனங்கள் வியட்நாமிலிருந்து இந்தியாவுக்கு டிவி உற்பத்தியை மாற்றவும், இந்தியாவில் அதிகம் முதலீடு செய்யவும் இந்திய அரசு விரும்புகிறது. அதனால் இறக்குமதி வரியைக் குறைக்க வாய்ப்பிருப்பதாகக் கூறப்படுகிறது.
இந்தியாவில் டிவி உற்பத்தியை ஊக்குவிப்பதற்காக சென்ற ஆண்டின் செப்டம்பர் மாதத்தில் உதிரிப்பாகங்களுக்கான இறக்குமதி வரி ஒரு வருடத்துக்கு ரத்து செய்யப்படுவதாக அறிவிக்கப்பட்டது. இச்சலுகையை நீட்டிக்காவிட்டால் இந்திய டிவி உற்பத்தியாளர்கள் கடுமையாகப் பாதிக்கப்படுவார்கள் என்று முறையிடப்பட்டுள்ளது. ஏற்கெனவே கொரோனா ஊரடங்கால் வருவாய் குறைந்து செலவுகள் அதிகரித்துள்ள நிலையில் இது கூடுதல் சுமையை ஏற்படுத்தும் என்று முறையிடப்பட்டுள்ளது.
விரைவில் பண்டிகை சீசன் தொடங்கவிருக்கும் நிலையில் வாடிக்கையாளர்கள் சலுகை விலையில் டிவி வாங்கலாம் என்ற எதிர்பார்ப்பில் உள்ளனர். இதுபோன்ற சூழலில் டிவி விலை உயர்ந்தால் டிவி விற்பனை பாதிக்கப்படும் என்பதோடு, மக்களும் அதிகம் செலவிட வேண்டியிருக்கும்.
தகவல் : சமயம்